Psalms 92

Maaron igham ndiran deŋiadi tineep pooi

Mbouŋ to umbom patabuaŋ

1Yoova, yom Maaron To Ulib pa Ndimaronŋa Tisob.
Ighaze you napait ghom pa poia tiom, ve nambou pa napait izam, nene igham lolog poia.

2Mboŋmaagh to naol ne, navovotia ŋgar tiom to lolom ineep tuŋia ila to tamtoghon tiom ve uluul di.
Ve mboŋ, you navovotia gabuam to utataghon saveeŋ mbuaaŋ tiom.
Ŋgar tovene igham lolog poia kat.

3You narabrab gita ve kulele, ve namboumbou pa napait ghom.

4Pasa, Yoova, uraat tiom igham lolog poia kat.
Matag ilala pa mbeb naol to nimam igharaat di, ve nambou toman tinig iza.

5Yoova, uraat to yom ughamgham di, nene tintina kat.
Ve ŋgar tiom paam, pughu ariaŋa. Ila le ila kat. Tovenen nagham ŋgar pani, eemoghon naraua maau. ^a
6Eemoghon yes kankanooŋa tighilaal maau.
Ŋgar todi inimale borouŋa. Tauto pataŋani to pale ivot pa ndiran samsamia, yes tigham ŋgar pani maau.

7Onoon, aazne ndiran samsamia tivot tinim naol tinimale kikiliiŋ samsamia to tisaas le tirau ndug.
Ve yes to tinoknok ghamuuŋ sosor, taghita taghaze nepooŋadi, poia kat.
Eemoghon muri, yom pale upasob di, le tisob kat.
8O Yoova, yom uneep sala, ve ughamgham pooz irau sawa isob.

9Onoon kat, koiamŋa to tighamgham ŋgar samia, yom pale ureu mbirisan di, ve tisob tilaledi.
10Eemoghon you, yom upakur ghou, ve ugham tapirig ivot tiina inimale makau sagsag.
Ve poia tiom izaza tiou, inimale tiliŋ ŋgoreeŋ poia izala poghog.

11Yom utatan koiagŋa, ve tisami ila matag.
Yom uwaghamun ndiran samsamia tonowen, ve nalooŋ katin taŋiiz todi.
12Eemoghon ndiran deŋiadi pale tineep pooi, ve ŋgar popoia katindi tivotvot ila lolodi inimale niu rabu.
Ve irau tisami maau. Pale tiyoon tuŋia ve tineep mala, tinimale ai mendepur tintina to Lebanon. ^b

13Yes tinimale ai to tivazog di ila rumai patabuaŋ to Yoova dige.
Pale tineep pooi ilooŋ ila Maaron toit rumai toni sirsiira.

14Ve sawa to tinim ndolman watwaat, tapiridi inepneep sone, ve tighamgham ŋgar popoia tivotvot, tinimale ai papaghu to anoŋadi katindi. ^c

15Ve tivovotia saveeŋ tovene tighaze: “Yoova iponpoon ghou inimale raŋ to izala kat.
Sosor eta ineep toni maau.
Ŋgar toni isob, nene deŋia moghon.”